اغزال الداويه(شعر ملحون) ل أمين 350

اغزال الداويه
في طريقي مروح للدار	صادتني اغزال الداويه
وانا عقلي جاش وطار	يامبهى ذيك البدويه
نظرتلي كحلة لشفار	أرمتني برموش قويه
حرقتني بمقابص نار	في هواها نا رحت اضحيه
سقصتني واش اللي صار	قلتلها أنت اللي بيه
جاوبتني زينة لنظار	الموعد غدوة لعشية
وقالت يالباهي المسرار	اعيونك رام شهلوا فيه
من بكرة ارجع لي طيار	تلقاني مثل الحوريه
وصارحني بالحب جهار	وبرد النار المقديه
ونعطي لك عنوان الدار	وروح اخطبني من ماليه
تتهنى من ذا الدمار	وتعيش معيشة هنيه
ونعدوا أحلى لعمار	بالحب الصافي مبنيه
وتبقى حكايتنا تذكار	محفوفة بالحب نقيه
ومشات الريم ياحظار	تتهادى كي مثل البيه
ودعتني توديع احرار	ومن ثمة مارجعت ليه
غابت عني باستمرار	والكبدة عنها مكويه
مارحمتني من الدمار	طلت وفاجت اعليه
ماجاني منها بشار	يطيب لي الخاطر شويه
ويرحم القلب المنهار	ويفرج عنو بهديه
راني نرجى كل نهار	من الصبحة حتى لعشيه
أيامي رجعت امرار	ياربي واش هل لبليه
سقصيت عليها الاوتار	ورنات العود الشجيه
سقصيت عليها الازهار	عقبتش النسمة القبليه
سقصيت أوراق الاشجار	طاحت تتباكى في يديه
وقالت لي أعيون لحبار	اداوها اليوم الصبيحيه
هزوها فمحفل جرار	بالبارود والفنطازيه
وغابت امعاها لخبار	راحت وصبحت منسيه
أعرفتو الزمان الغدار	اخدعني وعملها بيه
خلاني عايش لظرار	احرمني من هل لبنيه
وعلاش يالزمان المكار	اتسيل دمعة عينيه
وتفرق بين الاخيار	وتصهد لحباب بوحشيه
آهن يالقلب المحتار	الدنيا مافيها حنيه
اتخليك ديما فلكدرا	وما تطلب منك امزيه
لازم تحذر كل نهار	الدنيا راي ليك اخطيه
وحاذر لاحياتك تنهار	وعمرك يروح ارزيه
صابر وكونك صبار	واحمل لهموم المجليه
وكابد الظر ولوعار	وارضى بمكتوبك بالنيه

قصيدة للشاعر الشعبي كمال بن ناجي ...أمين 350
جميع الحقوق محفوظة

لمتابعة ردود الأعضاء حول القصيدة

http://wadilarab.kalamfikalam.com/t15635-topic

Posted in: مساهمات أدبية من طرف اعضاء المنتدى