قصيدة (يا قرية) من أجمل ما كتب الشاعر ابو رمزي

 يـــــا قريـــــة

يا قرية مقواه ذا الشعب اتبهدل ****المير اللي جي يخدم عرشو و أماليه
على كل باب بيرو دارو موعرقل * *** وعالبادج كاتب لعندو حق يديه
المعريفة جاريه تحت الظل **** في السرية التامة كلش تقظيه
القرار في درج المكتب امعطل ****ماكانش اجوامير لكاشي و اسنيي فيه
الرشوة و البيسطو و الفساد استفحل ****و المير اللي جي اغمض عينيه
السكنى و السيارة يبيع يشري و ابدل****يتلبد خايف الناس ايفيقو بيه
المواطن البسيط كره اجرى و افشل****حقو قدامو ضاعلو مابين يديه
ولد لبلاد راسو تحت اسفل**** يا خوتي شوفو الظلم بعينيه
الحم الدار ياكلو البراني راعي البل ****ولد القرية خربه ظلمه تكفيه
مولا الجاه و المال ابجلوه يستهل****و المغبون اظال عند المير احلل فيه
يا قرية رعيان تاكل في جنبك ما اتمل****و المسؤول اللي جي يطوالو كرعيه
يا قرية مقواه شعبك عايش في الذل ****ماالقاش اشكون انش الذبان اعليه
الشبيبة عاطلة مالقت امنين اطل****و الادارة فاهمة فن التمويه
هاذا حالك يا قرية صيفتك ماتتبدل ****والقانو ن اللي جي الجهال امفيدا فيه
كاين شيء عباد تستاهل الذل ****حاشا الفقير اللي ماعندو مايكفيه
ياراس المحنه جاوبني وين راه الحل ****واش قالو كبار القرية قول هيه
اكلابك في الانتخابات اتحشم و اتحلل****اعطيني صوتك تشوف الخير بعينيه
في كل ركنه و اتجاه تجري اتهرول****هذا متصدر حزب العدالة زكيه
ظرك ناسك بقات غير ادلل*****امعوله على قفة رمضان محسوب عليه
اجرحتي حبيبك و جميع من قال انا افحل****احطوه في القائمة اسمو مغضوب عليه
يا قرية مقواه شعبك اتبهدل****المير اللي يجي يخلق مشكل اسهيه
هم الغاز و التريسيتي مالقينالو حل****زاد هم الريزو ولشان نسى فيه
مسؤول سونلغاز اعرض في اكتافو يستطول****روحو اشكو للوالي منو زيدوالهيه
اطرق امحفره عمها الطين و لوحل****و الماء مغلاه مر من لكماين نشرو فيه
كلانا الناموس و البورززو زاد جمل****و لي لدغاتو عقرب الموت تديه
ماني طالب جاه لا هزان زبل****نخمم في ولد ولدي وينا اصبيطار نداويه
بلغت صوتي معليهش حتى كي نتسلسل ****هذا وقت الذل خلوني نهجيه
اتمشريك الفم في لقهاوي يجيهم ساهل****اقلك خلي البير بغطاه اواه لا تاذيه
بركانا من جار و مجرور فرمي و اقفل ****ادجيه دوبل سيس في الصلاة تنسيه
يا راس المحنه مهما الزمان يوادعك و اطول****موحال صور الرمل لا اتعليه
يا قرية لسان حالك لغافل يشمل****العبد الجاهل لعمر خسارة فيه
يا قرية مقواه ذا الشعب اتبهدل****كل غريب يرجع للحيط اكاليه
جانا رمضان و شعبان قريب يرحل****لعندو كبش خروف من ريان يجي يديه
اكتب يا تاريخ القرية و زيد سجل ****خليتلك شعري امانه للاجيال ترويه
تعيشي حره يا قرية و كلي امل****و جه ربيع كل صباح نتامل فيه
تاليف الشاعر { عبد المالك محمودي .ابو رمزي }
زريبة الوادي في 16/07/2011
جميع الحقوق محفوظة للشاعر

ملاحظة : لرفع كل لبس و تاويل من طرف البعض سامحهم الله و هذا رايهم ان قصيدة يا قرية انهكتني و اتعبتني و هي كما تعالج و تنتقد الواقع المعاش و الوضع السائد خاصة سكان الجزائر العميقة و هي شاملة اي لا تخص بيئة و محيط الشاعر فقط
تنبيه : ان مصطلح البراني لا اقصد به اي فئة معينة كما اقصد بكلمة المير كل مسؤول في اي مركز كان و البراني لا اقصد به السكان الخارجين عن المنطقة كلنا جزائريين و لنا حق في هذه البلاد و لكن اقصد به اصحاب الجاه و المال و السلطه الجهال الذين لا يتخذون الاساليب الغير قانونية كالرشوة و ما الى ذلك للوصول الى المبتغى المنشود و في الاخير اشكر الجميع على التفهم و شكرا و لكم حرية الحكم على قصيدتي هذه و شكرا و الى اللقاء و انا في اتظار ردودكم و فقني الله و شكرا امضاء الشاعر :أبو رمزي
توضيح :{ لا يحق لاي شخص او جهة مادي و معنوي نسخ او نقل او طبع او نشر هذه القصيدة الا باذن كتابي من طرف الشاعر و شكرا }




لمتابعة ردود الاعضاء حول القصيدة 
http://wadilarab.kalamfikalam.com/t17648-topic

تم أخذ الموافقة من الشاعر ابو رمزي علىنشر القصيدة على صفحات المدونة

Posted in: مساهمات أدبية من طرف اعضاء المنتدى