التريسيتي(شعر ملحون) للشاعر هشام هشام

التريسيتي

أرجع يا زمـان و ذكرني بذوك الأيــام *** تاريخ السبــعينات في قلبي مشـهود

التريسيتي تـيار و في الكابلات عــوام *** موصول لكل دار بالكـنتور مشــدود
الزريـبه ولت أفـنار دور فـــيها حـوام *** ما تخاف من ظلمة و لا سارق حقود
البلاد راهي كبرت زادت في الأحجام *** و ترسيتي شاخ انقص في المـــردود
سونلغار تسـير فيه تطـــلق بالغــــرام *** هذا لاحقو الجر وذاك عليه مســدود
هـاوُ جاء هاوُ راح يتقـطع على الدّوام *** ما يقول شيخ كبير ولا صغير مولـود
تراثي نفـتخر بيه عاشـــت فيه أقــوام *** رجعونا ليه العَرُوش وقرْبَة الجـدود
اليوم عصر التكـلونوجيا وزيد بالقـدام *** لازم يقــطعوه مظـــخات بلا مجـهود
يتقطع بالساعــات راهـم علينا ارغــام *** حصتين في اليوم تحـرق كل الجــلود
المريض راه حـــاير عايش في دوام *** يروح لسبطار ولى يقعد بدار ممدود
المكيف في الحــيط عشش فـيه لحمام *** غير الشهيلي يغـرد انسى ذاك لبـرود
العَرق ماء سايل نظـــافة كـل أجـسام *** هدية من سونلـغاز ما تدفـع فـيه نْـقود
الماء البارد أنسى تتـوحم عليه توحام *** الفريشـدان حابسة ساكـن فيها الـــدود
التلفزيون أكحل محكوم عليه بالإعدام *** عند لمعلم امسوطي فيزبلات و ديـود
التاجر حاير مسكين ديمة في التخمام *** هذي سلـعة فاســــدة أغلـق يا محـمود
الخــباز ريقو ناشف عايش في حـمام *** الخـبز ما هو طايب كــول يا مسعــود
التريسيتي ماشي و خارج في انسجام *** يتمتع بيه البراني عاقـب على الحـدود
سونلغاز غنية مالها كـثير يا ســـــلام *** حرماتو علينا و ديمه في الخط رقــود
الفاتورة راهي جات هذا شيء معلوم *** لازم نعمل طابورات مسلسلة كالعنقود
خايف من الروطار طــابع بيه اخــتام *** ترضى بالزيادة ولى طـار من لعــمود
تمتع يا زريبي هذا حالك طــول العام *** حرارة الصيف و العَرق سايل ومعقود
أنفض الغبارعلى روحك فكر بالقـدام *** بلادك تزهى بيــك تتـحقق كل العــهود
طالب بالحــقوق في تَعــقـل و نـظام *** ما تعـمل تخـريب ولا تعــصب مشـدود
تنال كـل الأماني تعـــيش في ســـلام *** زريبة الواد غالية بلاد الشــيخ المـولود
رمضان على لبـواب تـوبة وصـــيام *** أصـبر يا مـومن ثـــــوابك عند الــودود 

الشاعر:هشام هشام

لمتابعة ردود الأعضاء على القصيدة تفضل من هنا

http://wadilarab.kalamfikalam.com/t17626-topic

Posted in: مساهمات أدبية من طرف اعضاء المنتدى